by Robert Burns (1759 - 1796)
Wha will buy my troggin, fine election...
Language: Scottish (Scots)
Wha will buy my troggin, fine election ware, Broken trade o’ Broughton, a’ in high repair? Chorus: Buy braw troggin frae the banks o’ Dee; Wha wants troggin let him come to me. There’s a noble Earl’s fame and high renown, For an auld sang—it’s thought the gudes were stown— Buy braw troggin, ... Here’s the worth o’ Broughton in a needle’s e’e; Here’s a reputation tint by Balmaghie. Buy braw troggin, ... Here’s its stuff and lining, Cardoness’ head, Fine for a soger, a’ the wale o’ lead. Buy braw troggin, ... Here’s a little wadset, Buittle’s scrap o’ truth, Pawn’d in a gin-shop, quenching holy drouth. Buy braw troggin, ... Here’s an honest conscience might a prince adorn; Frae the downs o’ Tinwald, so was never worn. Buy braw troggin, ... Here’s armorial bearings frae the manse o’ Urr; The crest, a sour crab-apple, rotten at the core. Buy braw troggin, ... Here’s the worth and wisdom Collieston can boast; By a thievish midge they had been nearly lost. Buy braw troggin, ... Here is Satan’s picture, like a bizzard gled, Pouncing poor Redcastle, sprawlin’ like a taed. Buy braw troggin, ... Here’s the font where Douglas stane and mortar names; Lately used at Caily christening Murray’s crimes. Buy braw troggin, ... Here is Murray’s fragments o’ the ten commands; Gifted by black Jock to get them aff his hands. Buy braw troggin, ... Saw ye e’er sic troggin? if to buy ye’re slack, Hornie’s turnin chapman—he’ll buy a’ the pack. Buy braw troggin, ...
About the headline (FAQ)
Authorship:
- by Robert Burns (1759 - 1796), "Ballad on Mr. Heron’s Election — No. 4" [author's text not yet checked against a primary source]
Musical settings (art songs, Lieder, mélodies, (etc.), choral pieces, and other vocal works set to this text), listed by composer (not necessarily exhaustive):
- by Francis George Scott (1880 - 1958), "Wha will buy my troggin?", published 1922 [ male voice and piano ], from Scottish Lyrics, Book 2, no. 1, Bayley & Ferguson [sung text not yet checked]
Researcher for this page: Iain Sneddon [Guest Editor]
This text was added to the website: 2018-11-21
Line count: 37
Word count: 257