by Gautier de Dargies (c1165 - 1236+)
La doce pensee
Language: Old French (Ancien français)
La doce pensee Ki me vient d'Amors M'est el cuer entree Tos jors, sans retor; Tant l'ai desiree, La doce dolor, Ke riens ki soit nee Ne m'a tel savor. Doce dame, ainc ne vos dis nul jor Ma grant dolor, ains l'ai tos jors celee. Mort m'ont mi oel, ki m'ont mis en esror Dont la paine n'ert ja jor achievee; Je lor pardoins, car tant m'ont fait d'onor Ke la millor del mont en ai amee. Qui voit sa crine bloie Ki samble ke soit d'or, Et son col ki blançoie Deseur som bel chief sor! C'est ma dame, ma joie, Et mon rice tresor; Certes, je ne vauroie Sans li valoir Hector. De si belle dame amer Ne se porroit nus desfendre; Puis k'Amors m'i fait penser El m'i devroit bien aprendre Coment porroie achiever Puis k'aillors ne puis entendre. Se je li disoie Ke s'amors fust moie, Grant orguell feroie Nis se le pensoie. Ains sosferrai mon martire, Ja ne savra mon pensé Se par pitié ne remire Les maus [que me fait porter]; Car tant redoc l'escondire De sa tres grant volenté; Tel cose porroie dire Dont el me saroit mal gré. La ou Diex a assamblé Pris et valor et bonté, T'en va, descors, sans plus dire, Fors itant, pour l'amor Dé, C'om puet bien par toi eslire Ke je ne chant fors por lé Dont Diex me doinst estre amé.
Authorship:
- by Gautier de Dargies (c1165 - 1236+) [author's text checked 1 time against a primary source]
Musical settings (art songs, Lieder, mélodies, (etc.), choral pieces, and other vocal works set to this text), listed by composer (not necessarily exhaustive):
- by Gautier de Dargies (c1165 - 1236+), "La doce pensee" [tenor] [text verified 1 time]
Researcher for this text: Emily Ezust [Administrator]
This text was added to the website: 2011-01-02
Line count: 47
Word count: 237