At Willie's wedding o' the green,
The lasses, bonny witches,
Were buskit out in aprons clean,
And snaw-white Sunday's mutches.
Auld Maysie bade the lads tak' tent,
But Jock wad nae believe her;
And soon the fool his folly kent,
For -- Jenny dang the weaver.
Sing, fa la la, etc.

In ilka countra-dance and reel,
Wi' her he wad be babbin;
When she sat down, then he sat down,
And till her wad be gabbin:
Whare'er she gaed, or but or ben,
The coof wad never leave her,
Ay cacklin like a clockin hen;
But -- Jenny dang the weaver.
Sing, fa la la, etc.

Quoth he, "My lass, to speak my mind,
"Good haith! I need na swither;
"You've bonny een, and gif you're kind,
"I needna court anither."
He hum'd and ha'd -- the lass cried, Feugh!
And bade the fool no deave her;
Then snapt her thumb, and lap and leugh,
And -- dang the silly weaver!
Sing, fa la la, &c.