Armes, amours, dames, chevalerie,
Clers, musicans et fayseurs en françoys,
Tous sosfistes, toute poëterie,
Tous cheus qui ont melodieuses vois,
Ceus qui cantent en orgue aucunes foys
Et qui ont chier le doulz art de musique,
Demenés duel, plourés, car c’est bien drois,
La mort Machaut, le noble rethouryque.
 
Onques d’amours ne parla en follie,
Ains a esté en tous ses dis courtois,
Aussi a molt pleü sa chanterie
Aus grans seigneurs, aus contes, aus bourgois.
Hé! Horpheüs, asses lamenter dois,
Et regreter d’un regret autentique,
Arethuse aussi, Alpheüs, tous trois,
La mort Machaut, le noble rethouryque.
 
Priés por li si que nulls ne l’oublie :
Ce vous requiert le bayli de Valois,
Car il n’en est au jor d’ui nul en vie
Tel com il fu, ne ne sera des moys.
Complains sera de contes et de roys
Jusqu’au lonc temps per sa bone practique.
Vestés vous noir ; plorés, tous Champenois,
La mort Machaut, le noble rethouryque.

O flour des flours de toute melodie,
Tres doulz maistres qui tant fuestes adrois,
O Guillaume, mondains diex d’armonnie,
Après vos fais, qui obtiendra le choys
Sur tous fayseurs ? Certes, ne le congnoys.
Vo nom sera precieuse relique,
Car l’en plourra en France, et en Artois,
La mort Machaut, le noble retorique.
 
Le fons Cirée et la fontayne Helie,
Dont vous estés le ruissel et le dois,
Où poëtes mirent leur estudie,
Convient taire, dont je suy molt destrois.
Las ! c’est pour vous, qui mort gisiés tous frois,
Qu’ay un dolent depit, faillant replique,
Plourés, arpes et cors saracynois,
La mort Machaut, le noble retorique.
 
Rubebe, leuths, viële et ciphonie,
Psalterion, tous instrumens courtois,
Rothes, guisternes, fleustes, chelemie,
Traversaynes et vous, nimphes de bois,
Timpane ossy, metés en euvre doys,
Tous instrumens qui estes tout antiques,
Faites devoir, plourés, gentil Galoys,
La mort Machaut, le noble retorique.