Motetus
 Felix virgo, mater Christi,
 Que gaudium mundo tristi
 Ortu tui contulisti,
 Dulcissima;
 Sic hereses pervenisti,
 Dum angelo credidisti
 Filiumque genuisti,
 Castissima.
 Roga natum, piissima,
 Ut pellat mala plurima
 Tormentaque gravissima,
 Que patimur;
 Nam a gente ditissima,
 Lux lucis splendidissima,
 De sublimi ad infima
 Deducimur;
 Cunctis bonis exuimur,
 Ab impiis persequimur,
 Per quos, virgo, subicimur
 Servitutis,
 Nam sicut ceci gradimur
 Nec directorem sequimur,
 Sed a viis retrahimur
 Nobis tutis.
 Gracie fons et virtutis,
 Sola nostre spes salutis,
 Miserere destitutis
 Auxilio,
 Ut a culpis absolutis
 Et ad rectum iter ductis
 Inimicisque destructis
 Pax sit nobis cum gaudio.

Triplum
 Inviolata genitrix,
 Superbie grata victrix
 Expers paris,
 Celestis aule janitrix,
 Miserorum exauditrix,
 Stella maris,
 Que ut mater consolaris
 Et prolapsis deprecaris
 Humiliter,
 Gracie fons singularis,
 Que angelis dominaris,
 Celeriter
 Para nobis tutum iter
 Juvasque nos viriliter;
 Nam perimus,
 Invadimur hostiliter,
 Sed tuimur debiliter.
 Neque scimus
 Quo tendere nos possimus
 Nec per quem salvi erimus
 Nisi per te.
 Eya! ergo poscimus,
 Ut sub alis tuis simus
 Et versus nos te converte.

Tenor:
 Ad te suspiramus gementes et flentes....