Dört unter isch der Früehlig cho, 
Dört lacht eim's Lebe lieblifroh, 
Dört unte spiilt der Sunne Glast 
Und  's Vögli pfiift uf grüenem Nast. 
Dört unten, unte möchti sy! 

Hie obe schloft no Allis fest, 
Chüel weiht der Ost und füücht der West, 
Der Berg lüpft no si Chäppli nit, 
Er meint, es seig no immer Zit. 
Dört unten, unte möchti sy!  

Drum blibi hie nit länger au, 
Und willem au in 's Gsichtli g'schau, 
Wo Allis se sölli fröhli macht, 
Aß Allis springt und singt und lacht, 
Dört unten, unte mueßi sy!  

Und woni unte gang und sih, 
E Blüemli dort, e Blüemli hie! 
Und  's Vögli rüeft im Wandrer no: 
Isch au di Schätzli wieder do?  
Dört-unte willi nümme sy. 

Mi Schätzli  --  io, i denk wol dra, 
I ha io au emol eis gha. 
O Vögli, spar di lose G'sang, 
Du machsh mer numme 's Herzli bang. 
Uf 's Bergli obe chresmi hi.