Tune - If a Body meet a Body

O Marion is a bonny lass,
  There's glawmry in her smile; 
And yet by a' it is confest,
  That Marion's free frae guile.

Ilk rising thought, before she speaks,
  Ye maist wad think ye saw;
An' then her voice comes like the breeze
  Blawn o'er the birken shaw.

Whane'er she sings, her artless notes
  In sweetness far exceed
The echo that frae rock to rock,
  Repeats the shepherd's reed.

An' a' the while a wavering blush
  Her modest fears discloses, 
Like a bonny bird that sings embowered
  Amang a bush o' roses.

Whan coming frae the fair wi' her,
  Though e'er sae late at een,
The gloom is light an hour's a blink,
  The muir's a foggy green.

But what I like the best of a',
  She says whan I'm beside her,
Be't light, be't dark, she never thinks
  That skaith can e'er betide her.