Quattro Canzoni veneziane

Quel ch'el prete m'abia leto
mi dasseno non lo sò;
sò che andavimo a brazzetto
poco dopo tuti do.
 
Sò che prima, povarazzo,
de no sempre ghe diseva,
né'l podeva urtarme un brazzo
che de fogo me faceva.
 
Sò che adesso se qualcossa,
povareto, el vol da mi,
ciò! devento ancora rossa,
ma che digo sempre sì!
 
Se te vardo ti me ridi,
né più el viso ti te scudi,
se te ciamo ti rispondi
so qua, vissere co' ti.
 
Ti xe bela più che prima,
ti xe sempre la mia zogia,
t'indovini ogni mia vogia,
ti me disi sempre sì;
 
e pur varda se più grando
se pol dar de sto strambesso,
mi me par de giusto adesso
ti me vogi manco ben.
 
E na crussio e me tormento
nel pensarme che ora mai,
quei bei tempi xe passai,
quei bei zorni più no vien,
 
quei bei zorni, zorgia mia,
che incontrandose coi oci,
me ricordo che i zenoci
ne tremava a tuti do,
 
quei bei zorni che "no vogio"
ti disevi tuta rossa,
e mi a ti: " mo' via, parcassa?"
e ti a mi: "perché de no!"

Do baloni de carta in t'un batelo,
la vose de un'armonica lontana,
dal Lido quieto un venteselo,
San Zorzi in bassa e in fianco la Dogana.
 
La luna in alto,che da mezo el cielo
se specia in aqua come 'na sultana;
la gondola che passa e che bel balo
in fregola la manda e se alontana.
 
E mi sul molo pensieroso intanto
che vado tormentandome a dar viva
tuta la poesia de quel'incanto,
el biscio sento d'un vapor che ariva,
e sento l'onda che de tanto in tanto
vien per burlarme a sciafisar la riva.