O! shairly ye hae seen my love
Down whaur the waters wind:
He walks like ane wha fears nae man
And yet his e’en are kind.

O! shairly ye hae seen my love
At the turnin o’ the tide;
For then he gethers in the nets
Doun be the waterside.

O! lassie I hae seen your love
At the turnin o’ the tide;
And he was wi’ the fisher-folk 
Doun be the waterside.

The fisher-folk were at their trade
No far frae Walnut Grove;
They gether’d in their dreepin nets
And fund your ain true love.