Volez oir la muse Muset?
En mai fu fete, un matinet,
en un vergier flori, verdet,
au point du jour,
ou chantoient cil oiselet
par grant baudour.
Et j’alai fere un chapelet
en la verdor.
Je le fis bel et cointe et net
et plain de flor.
Une dancele
avenant at mult bele
gente pucele,
bouchete riant,
qui mi rapele:
«Viens ça!» me dist ele,
«Si me viele 
ta muse en chantant?»
tant mignotement.

J’alai a li el praelet
atout la vïele et l’archet.
Si li ai chanté le muset
par grant amour:
«J’ai mis mon cuer en si bon cuer
Espris d’Amours …»
Et quant je vi son chief blondet
et sa color
et son gent cors amoreuset
et si d’ator,
mon cuer sautele
pour la damoisele.
Mult renouvele
ma joie souvent.
Ele ot gounele
de drap de Castele
qui restencele.
Douz Deus, je l’aim tant
de cuer loiaument!

Quant j’oi devant li vïelé
pour avoir s’amour et son gré,
elle m’a bien guerredoné,
soe merci,
d’un besier a ma volenté,
Deus! que j’aim si!
Et autre chose m’a donné
com son ami
que j’avoie tant desirré.
Or m’est meri!
Plus sui en joie
que je ne soloie,
quant cele est moie
que je tant desir.
Je n’en prendroie
n’avoir ne mounoie,
pour riens que voie
ne m’en qier partir;
ançois vueil morir.

Or a Colin Muset musé
et s’a a devise chanté
pour la bele au vis coloré,
de cuer joli.
Maint bon morsel li a doné
gel vous affi
et de bon vin fort a son gré,
et departi.
Ensi a son siecle mené
jusques ici.
Oncor dognoie
en chantant maine joie,
mult se cointoie,
qu’Amors veut servir,
si a grant joie
el vergier ou dognoie,
bien se conroie.
Bon vin fet venir
trestout a loisir.