En mai, quant li rossignolet
Chantent cler ou vert boissonet,
Lors m'estuet faire un flajolet,
Si le ferai d'un saucelet,
Qu'il m'estuet d'amors flajoler
Et chapelet de flor porter
Por moi deduire et deporter,
Qu'adès ne doit on pas muser.

L'autrier en mai, un matinet,
M'esveillerent li oiselet,
S'alai cuillir un saucelet,
Si en ai fait un flajolet ;
Mais nuns hons n'en peut flajoler
S'il ne fait par tout a loer
En bel despendre et en amer
Tot sanz faintise et sanz guiler.

Garnier, cui je vi joliet,
Celui donrai mon chapelet.
De bel despendre s'entremet,
En lui nen a point de regret,
Et por ce li vuil je doner
Qu'il aimme bruit et hutiner
Et aimme de cuer sanz fauser ;
Ensi le covient il ovrer.

La damoisele au chief blondet
Me tient tot gai et cointelet ;
En tel joie le cuer me met
Qu'il ne me sovient de mon det :
Honiz soit qui por endeter
Laira bone vie a mener !
Adès les voit on eschaper,
A quel chief qu'il doie torner.

L'en m'apele Colin Muset,
S'ai mangié maint bon chaponet,
Mainte haste, maint gastelet
En vergier et en praelet,
Et quant je puis l'oste trover
Qui veut acroire et bien prester,
Adonc me preng a sejorner
Selon la blondete au vis cler.

N'ai cure de roncin lasser
Après mauvais seignor troter :
S'il heent bien mon demander,
Et je, cent tanz, lor refuser.