Amuri amuri chi m'ha fattu fari
m'ha fattu fari na ‘ranna pazzìa
lu patrannuostru m'ha fattu riscurdàri
e ‘a mèglia parta ‘i l'avimmarìa.

Sutta a lu sinalu cc'è ‘u mele
sugnu guagliunu e vulissa pruvàre.

Lu sùonnu di la notti m'ha’ arrubbatu
e t’ha’ purtatu a ddòrmiri cu ttìa
mò mprestamilla tu, n'ura di sùonnu
c'all'ùrtimi d'Agùstu pu’ t’’u rìennu.

‘u vu’ sapìri quannu mi quietu?
quannu duormu cu ttìa latu ccu llatu.

‘u vu’ sapìri qual è ’u mègliu dòrmiri?
ntr’u liettu abbrazzatu ccu ttìa.
Sugnu luntanu e lu hiatu mi tiri
e ppenza si n'avìssim’i vasàre.

Affàccia a la finestra bella figlia
trema la faccia mia comu ‘na frunna
ca si’ cumu na pàmpina virmiglia
c'àbbiti ntra le graste di tirraglia.

Biniritta ‘a mamma di ssa figlia
di li billizzi sua, ‘u sulu cummòglia.
Conza ssu liettu e minti ssi cuscini
ca stasira è la nostra cuntintizza.

Conza ssu liettu e spanna ssi linzùli
quantu mi vìegnu asciuttu ssi sudùri.

Conza ssu liettu supa a chissi minni
quantu arripùosu n'ura e minni manni.
Bella p'amari a ttia haiu persu ‘u ciucciu:
ora diciamillu tu a cchini ‘ncavarcu.

Galera sì d'amuri duci ntiennu
stinnardu ca fa lustru a ttutti i bbanni.
D'oru ssu pìettu e dd'argientu ssi minni,
viàtu chiru criatùru ca si cci appenni.

Chini prova ‘u latti ‘i ssi ‘ianchi minni
campa quant'a Nnughè novicient'anni.

Chini si curca cu ttìa senza cammisa
trova ‘u paradisu e u’n s'arriposa.
Chini si curca cu ttìa na siratina
a mmenzannotti mparadisu acchiàna.