For' 'e llogge, addurose 'e mellone, 
Lampiuncielle e garselle appicciate, 
Mo ch'è 'o tiempo d' 'e bbelli ccanzone, 
Comm'a primma ve voglio vedè.

Napule, 'n'ora 'e gusto e ciente 'e guaje, 
Bella città, 
Ride, ce veve 'a coppa e campa assaje
Ca ll'aria 'o ddà.
Stasera cu 'a figliola ca ce attocca, 
Popolo, pò, 
A musso a musso, azzicco azzicco, oje vocca, 
Tu che ne vuò?

Sporte 'e fiche cu 'e giglie annuccate, 
Bancarelle 'e nanasse addurose, 
Maruzzare cu 'e vvoce 'ntunate, 
Nuje vulimmo vederve e sentì.

Mamma cu 'o ruoto sotto 'e mulignane, 
(Chi 'a vott' 'a ccà?)
Nenna cu 'o quarticiello cu 'e ppatane, 
(Chi 'a vott' 'a llà?)
Stasera cu 'a figliola ca ce attocca, 
Popolo, pò, 
A musso a musso, azzicco azzicco, oje vocca, 
Tu che ne vuò?

Schiara juorno, trummette sfiatate, 
Gente stracqua, sudata e sbattuta:
('Ncopp'ê mmazze ll'appese attaccate), 
Morta 'e suonno, ma bella a vedè.

Duorme ca 'o sole sponta e addorme 'e guaje, 
Napule, Nà, 
Vivece 'a coppa, ride e campe assaje
Ca ll'aria 'o ddà.
Sunnammoce 'a figliola ca ce attocca, 
Popolo, pò, 
A musso a musso, azzicco azzicco, oje vocca, 
Tu che ne vuò?