Qwand riv’nèt lès grands freûds,
Li nîvaye, lès djalêyes,
Ènn’a qui sont-st-ureûs
È l’ cwène di leû coulêye.
Mins mi, qwand c’èst l’iviér,
Dji sins qui m’ coûr si sérre ;
Ca, si dj’ sos bin covièrt,
Kibin ont dè l’ misére ?
Dji pinse å målureûs, qwand so l’ håye di m’ cot’hê,
Ricoviète di nîvaye, dji veû dès p’tits oûhês !

Avou totes vos tchansons,
Binamêye pitite bièsse,
Qwand c’èsteût l’ bonne sêzon
Vos m’ mètîz l’ coûr è lièsse.
Oûy, vos-avez mutwèt
Faim d’on p’tit grin d’avon.ne.
Èt dire qu’i-n-a come twè
Dès pôves divins lès pon.nes.
Dji pinse å målureûs, qwand so l’ håye di m’ cot’hê,
Ricoviète di nîvaye, dji veû dès p’tits oûhês !

Divins on neûr grignî,
Sins feu mågré l’ frudeûr,
N’åyant rin à magnî,
Ine niyêye d’èfants pleûre.
Li mére tot lès louquant
Fêt ‘ne fwèce, li mwért è l’åme,
Mins l’ pon.ne è l’ sèfocant,
Lèye ossu tape dès låmes.
Vola l’ tåv’lê qu’ dji veû, qwand so l’håye di m’ cot’hê,
Ricoviète di nîvaye, dji veû dès p’tits oûhês !

Mins Dièw a todi d’né
Ås-oûhês leû mèsåhe,
Come ås pôves divèt l’ fé
Lès cîs qu’ sont-st-à leû-z-åhe.
Dinans ås pôvrès djins
Qui l’ måva coûr rouvèye :
Richås d’on pô d’ârdjint
Vos polez ratch’ter ‘ne vèye.
Qu’on sondje å målureûs, qwand so l’ håye d’on cot’hê,
Ricoviète di nîvaye, on veût dès p’tits oûhês.