Je chevauchai l'autrier la matinee;
Delez un bois, assez pres de l'entree,
Gentil pastore truis.
Mes ne vi onques puis
Si plaine de deduis
Ne qui si bien m'agree.
Ma tres doucete suer,
Vos avez tout mon cuer,
Ne vous leroie a nul fuer;
M'amor vous ai donee.

Vers li me tres, si descendi a terre
Pour li vöer et por s'amor requerre.
Tout maintenant li dis:
«Mon cuer ai en vos mis,
Si m'a vostre amor sorpris,
Plus vous aim que riens nee».
Ma tres doucete suer,
Vos avez tout mon cuer,
Ne vous leroie a nul fuer;
M'amor vous ai donee.

Ele me dist: «Sire, alez vostre voie!
Vez ci venir Robin qui j'atendoie,
Qui est et bel et genz.
S'il venoit, sanz contens
N'en iriez pas, ce pens,
Tost avrïez mellee».
Ma tres doucete suer,
Vos avez tout mon cuer,
Ne vous leroie a nul fuer;
M'amor vous ai donee.

«Il ne vendra, bele suer, oncor mie,
Il est dela le bois ou il chevrie.»
Dejoste li m'assis,
Mes braz au col li mis;
Ele m'a geté un ris
Et dit qu'ele ert tuee.
Ma tres doucete suer,
Vos avez tout mon cuer,
Ne vous leroie a nul fuer;
M'amor vous ai donee.

Quant j'oi tout fet de li quanq'il m'agree,
Je la besai, a Dieu l'ai conmandee.
Puis dist, qu'en l'ot mult haut,
Robin qui l'en assaut:
«Dehez ait qui en chaut!
Ç'a fet ta demoree».
Ma tres doucete suer,
Vos avez tout mon cuer,
Ne vous leroie a nul fuer;
M'amor vous ai donee.