Dolerousement comence
Ki chanter veut de dolour.
Las! de çou ki plus m'agence
Ainc n'en euc joie sans plour.
Fols en fais ma penitance
Car ainc ne li quis s'amor:
Ens moi fait une grant tence
Volentés contre cremor.
Mult aim et has dire et taisir,
Car d'aus deus puis vivre et morir.

Amors est et fole et vaine
Ki trop est mise a bandon,
Mais quant apres la grant paine
Vient la joie par raison,
Lors est ele plus certaine
Et s'en sont li porfit bon.
De boin jor boine semaine;
Selonc l'uevre guerredon.
Mult aim et has dire et taisir,
Car d'aus deus puis vivre et morir.

Perils est de tos afaires
Dont on est auques certains,
Car tex li samble contraires
Ou joies est mult prochains.
Mieus vaut servirs et atraires
Et metre pour plus le mains;
Cuer failli ne pris jou gaires
Car trop est faus et vilains.
Mult aim et has dire et taisir,
Car d'aus deus puis vivre et morir.

Jou faic, je croi, tele atente
Com li Breton font d'Artus;
Amors m'ochist et tormente
Et si nel savra ja nus.
Miex me vient de li la tence
Si ke jou n'i faice plus
Que de la cortoise gente
Torner tote joie en sus.
Mult aim et has dire et taisir,
Car d'aus deus puis vivre et morir.