La doce pensee
Ki me vient d'Amors
M'est el cuer entree
Tos jors, sans retor;
Tant l'ai desiree,
La doce dolor,
Ke riens ki soit nee
Ne m'a tel savor.

Doce dame, ainc ne vos dis nul jor
Ma grant dolor, ains l'ai tos jors celee.
Mort m'ont mi oel, ki m'ont mis en esror
Dont la paine n'ert ja jor achievee;
Je lor pardoins, car tant m'ont fait d'onor
Ke la millor del mont en ai amee.

Qui voit sa crine bloie
Ki samble ke soit d'or,
Et son col ki blançoie
Deseur som bel chief sor!
C'est ma dame, ma joie,
Et mon rice tresor;
Certes, je ne vauroie
Sans li valoir Hector.

De si belle dame amer
Ne se porroit nus desfendre;
Puis k'Amors m'i fait penser
El m'i devroit bien aprendre
Coment porroie achiever
Puis k'aillors ne puis entendre.
Se je li disoie
Ke s'amors fust moie,
Grant orguell feroie
Nis se le pensoie.

Ains sosferrai mon martire,
Ja ne savra mon pensé
Se par pitié ne remire
Les maus [que me fait porter];
Car tant redoc l'escondire
De sa tres grant volenté;
Tel cose porroie dire
Dont el me saroit mal gré.

La ou Diex a assamblé
Pris et valor et bonté,
T'en va, descors, sans plus dire,
Fors itant, pour l'amor Dé,
C'om puet bien par toi eslire
Ke je ne chant fors por lé
Dont Diex me doinst estre amé.