Tristrant muose sunder sînen danc
stæte sîn der küniginne,
wan in der poysûn dar zuo twanc
mêre dan diu kraft der minne.
des sol mir diu guote danc
wizzen, daz ich solken tranc
nie genam und ich so doch minne
baz danne er und mac daz sîn.
wolgetâne
valsches âne,
lâ mich wesen dîn
unde wis du mîn.

Sît diu sunne ir liehten schîn
gegen der kelte hât geneiget
und diu kleinen vogellîn
ir sanges sint gesweiget,
trûric ist daz herze mîn.
ich wæne ez wil winter sîn,
der uns sîne kraft erzeiget
an den bluomen, die man siht
in liehter varwe
erblîchen garwe.
dâ von mir beschiht
leit und anders niht.