And wudna onie lad
Be gled noo he'd been born
As Bengie noo was gled
On his ain birthday morn:

To hae on his birthday morn,
Richt there in his lufe sae ticht,
The bonnie heft o' horn
And the blade sae glinty bricht?

He tried it on a raip:
He tried it on a stick:
And wow! it gar'd ye gape
Te see it wark sae snick.

He thocht he's hae a try
At Grannie's muckle chair:
And maybe, by and by,
He'll try his hurdies there.