Que n'ay-je, Dame, en escrivant la grace
Divine autant que j'ay la volonté!
Par mes escrits tu serois surmonté,
Vieil enchanteur des vieux rochers de Thrace.

Plus haut encor que Pindare et qu'Horace,
J'appenderois à ta divinité
Un livre enflé de telle gravité,
Que du Bellay luy quitteroit la place.

Si vive encor Laure par l'Univers
Ne fuit volant dessus les Thusques vers,
Que nostre siecle heureusement estime,

Comme ton nom, honneur des vers François,
Victorieux des peuples et des Roys
S'en-voleroit sus l'aisle de ma ryme.