Ces liens d'or, ceste bouche vermeille,
Pleine de lis, de roses et d'oeillets,
Et ces sourcis deux croissans nouvelets,
Et ceste joue a l'Aurore pareille :
 
Ces mains, ce col, ce front, et ceste oreille,
Et de ce sein les boutons verdelets
Et de ces yeux les astres jumelets,
Qui font trembler les ames de merveille,
 
Firent nicher Amour dedans mon sein,
Qui gros de germe avoit le ventre plein
D'oeufs non formez et de glaires nouvelles,
 
Et, lui couvant -- qui de mon cueur jouit
Neuf mois entiers  -- en un jour m'eclouit
Milles amoureaux chargez de traits et d'aisles