Han einist gewüßt ä bloe See. 
O stiend au det mys Hus! 
I han ä ase Büebli gseh, 
Ha g'juzet drüber us. 
O chöti au ä Vogel sy! 
I flügti drüber har und hi. 

Frymänge Sunntignumittag 
Han ich im Farechrut 
Vom Schöinebode, dure Hag, 
A See Luftschlößli but. 
Wän Sägelschiff druf gfahre sind, 
Was gfahri dri?  He, Chüngechind. 

O Härz, o warist nie sä wyt, 
Es wär dr nüd sä schwär! 
Am See d'Luftschlößli sind verhyt, 
Und d'Sägelschiff sind läär. 
Wie üb'rei 's Wasser chalt und gro, 
Wie üb'rei blöiß dr Himel blo.