Quand au dernier sommeil la vierge eut clos les yeux,
Les Anges qui veilloyent autour de leur maistresse,
Esleverent son corps en la gloire des cieux:
Et les cieux furent pleins de nouvelle allegresse.

Elle est la haut assise aupres du Roy des Rois,
Pour rendr‘ à nos clameurs ses oreilles propices:
Et sans cesse l’adjure au sainct nom de sa Croix,
De purger en son sang nos erreurs et nos vices.

Elle rend nos desirs par ses vœux exaucez:
Et pour mieux impetrer ce dont elle le presse,
Remet devant ses yeux tous les actes passez,
Qui le peuvent toucher de joye ou de tristesse.

Et lors elle luy va ses mammelles monstrant,
Qui dedans le berceau son enfance allaicterent,
Dont le doux souvenir va son cœur penetrant:
Et ses flancs biens-heureux, qui neuf mois le porterent.