Laetabundus rediit avium concentus, 
ver jocundum prodiit, gaudeat juventus, 
nova ferens gaudia; 
modo vernant omnia, 
Phoebus serenatur 
redolens temperiem, novo flore faciem 
Flora renovatur.  

Risu Jovis pellitur torpor hiemalis, 
altius extollitur cursus aestivalis  
solis beneficio, 
cujus omnis regio 
recipit teporem. 
Sic ad instar temporis nostri Venus pectoris 
reficit ardorem.  

Aestivantur Dryades, colle sub umbroso 
prodeunt Oreades, coetu glorioso, 
Satyrorum concio 
psallit cum tripudio 
Tempe per amoena; 
his alludens concinit, cum jocundi meminit 
veris philomena.  

Aestas ab exsilio redit exoptata, 
picto redit gremio tellus purpurata, 
miti cum sussurio 
suo domicilio 
gryllus delectatur; 
haec canore, jubilo, multiformi sibilo 
nemus gloriatur.  

Applaudamus igitur rerum novitati. 
Felix, qui diligitur voti compos grati, 
dono laetus Veneris, 
cujus ara teneris 
floribus odorat. 
Miser e contrario qui sublato bravio 
sine spe laborat.