Herz, mys Herz, warum so trurig,
Und was soll das Ach u Weh?  -- 
'S ist so schön i frömde Lande!  -- 
Herz, mys Herz, was fehlt der meh? 

"Was mer fehl'?  --  es fehlt mer alles! 
Bi so gar verlohren hie!
Syg es schön i frömde Lande,
Doch es Heimeth wird es nie! 

"Ach, i d's Heimeth möcht i wieder,  
Aber bald, du Lieber, bald!
Möcht zum Aetti, möcht zum M¨eti,
Möcht zu Berg u Fels u Wald! 

"Möcht die Firste wieder g'schauen 
Und die lutre Gletscher dra,
Wo die flingge Gemsli laufen,
U kei Jäger fürers cha!

"Möcht die Glogge wieder ghöre,
Wenn der Senn uf d'Berge trybt,
Wenn die Chueli freudig springen,
U kes Lamm im Thäli blybt!   

"Möcht uf Flüeh und Hörner singe,
Möcht am heiterblaue See,  -- 
Wo der Bach am Felse schumet,  --
Ueses Dörfli wieder g'seh! 

"Wieder g'seh die brune Hüsi,
Und vor alle Thüre frey 
Nachberslüt die fründlich grüssen  
Und es lustigs Dorfe bei!   

"Keine het is lieb hie usse,  
Keini git so fründlich d'Hand,
U kes Chindli will mer lache
Wie daheim im Schwytzerland! 

"Uf u furt!   u führ mi wieder
Wo's mir jung so wohl isch gfi!  -- 
Ha nit Lust, u ha nit Friede
Bis ig i mym Dörfli bi!" 

Herz, o Herz!   i Gottes Name,
'S ist es Lyde, gib di dry! 
Will's der Herr, so chaner helfe,
Daß mer bald im Heimeth sey!