Bele Yolanz en chambre coie
sor ses genouz pailes desploie :
cost un fil d'or, l'autre de soie.
Sa male mere la chastoie.
  «Chastoi vos en, bele Yolanz.

Bele Yolanz, je vos chastoi :
ma fille estes, faire lo doi.»
«Ma dame mere, et vos de coi ?»
«Je le vos dirai par ma foi:
  chastoi vos en, bele Yolanz.»

«Mere, de coi me chastoiez ?
Est ceu de coudre ou de taillier,
ou de filer ou do broissier ?
Ou se c'est de trop somillier ?»
  «Chastoi vos en, bele Yolanz.

Ne de coudre ne de taillier
ne de filer ne de brissier,
ne ceu n'est de trop somillier ;
mais trop parlez au chevelier.
  Chastoi vos en, bele Yolanz.

Trop parlez au conte Mahi,
si en poise vostre mari :
dolanz en est, jel vos affi.
Nel faites mais, je vos en pri.
  Chastoi vos en, bele Yolanz.»

«Se mes mariz l'avoit jure,
et il et tot ses parentez,
mais que bien li doie peser,
ne lairai je oan l'amer.»
  «Chastoi vos en, bele Yolanz.»