In Mondschein bin i in Wald draust gwest, 
Wo Quelln und Bacherln rauschn, 
Hab g'hört, was d' Vögerln singen than, 
Was Berg und Bleaml plauschn. 

Und hab da Zankn und Streitn ghört,
Auf Lebn und auf Tod, 
Wer allmal 's ersti Bußerl kriagt 
Von jungen Morgnroth. 

"I kriags am erstn,"  sagt der Bach, 
"Wal d' Wásser Spiagln seyn, 
Und da schaut si das Morgnroth 
Am aller Erstn h'nein!" 

Da sagn die Vögerln:  "mir than ihm, 
Am erstn auf's Göscherl fliagn, 
Wia 's nur aus d' Wolk'n 's Köpferl steckt, 
Drum mir thuan 's Ersti kriagn."  

"Nit wahr ist 's,"  sagt á alter Berg, 
"Mir sán den Bußl am nächstn," 
Und beutlt sein schneeweißn Kopf, 
"Den mir, mir sán die Höchstn,

"Und d' hochn Herrn kriagn Alles z' Erst, 
Hernach erst kriagn 's de Untn. 
Drum laßt's das Zankn und laßt's den Streit, 
Den Ös seyds überwundn." 

Da blast á Mailuft d' Sterndln aus, 
Und grad wia Rosn und Veigerln, 
Steigt aus die Wolkn 's Morgnroth, 
Mit seini Feuer Äugerln, 

Und über Hügln, Berg und Thal, 
Und über Wald und Wasser Fall, 
Uiber All 's was si aus der Erd erhebt, 
Uiber Alles was da wachst und lebt, 

Hat's ihri rothn Flügerln g'spant, 
Und fliagt so über Meer und Land,
Und küßt aus ihrn Himmls Zelt, 
Aufámahl z' gleich, di ganzi Welt.