I will awa' wi' my love, 
I will awa' wi' her;
Tho' a' my kin had sworn and said, 
I will awa' wi' her.
I'll o'er bogie, o'er bogie, 
O'er bogie wi' her, 
Tho' a' my kin had sworn and said, 
I will awa' wi' her.

For now she's mistress of my heart, 
And wordy of my hand,
And well I wat we shanna part 
For siller or for land.
I'll o'er bogie, &c.

Let rakes delight to swear and drink, 
And beaus admire fine lace; 
But my chief pleasure is to blink
On Betty's bonny face.
I'll o'er bogie, &c.

There a' the beauties do combine, 
Of colour, traits, and air,
The saul that sparkles in her een 
Makes her a jewel rare.
I'll o'er bogie, &c.

Her flowing wit gives shining life 
To a' her other charms,
How blest I'll be when she's my wife, 
And lock'd up in my arms!
I'll o'er bogie, &c.

There blythly will I rant and sing, 
While o'er her sweets I range, 
I'll cry, your humble servant, king,
Shame fa' them that wad change. 
I'll o'er bogie, &c.

A kiss of Betty and a smile, 
Albeit ye wad lay down
The right ye hae to Britain's Isle, 
And offer me ye'r crown. 
I'll o'er bogie, &c.