Helas! Je voy mon cuer a fin venir
En desirant avoir un don d'amour,
Qui tant m'a fait de bien et de plaisir
Quiconques nulz homs tant eut de baudour ;
Mais Fortune m'a joué d'un faulz tour
Dont se je n'ay secours de vray effort
    Je croy que brief seray sanz doubte mort.

He, Fortune, tu fais ton pris hair
A pluseurs gens qui treuvent amertour
En ta roue qui tout bien fayt perir,
Muer legier joye et jeu en plour ;
Or m'az bouté au fleuve de tristor
Dont je te di, quar tu me fays tel tort,
    Je croy que brief seray sanz doubte mort.

A vous supli, tresreluisant saphir,
Dois et ruissel, fontayne de douçour,
Gentil façon ou sont tuit mi desir,
Fruit vertueux de tresplaisant saveur,
Aleges moy de ma grieve dolour
Ou de certain, se n'ay de vous confort,
    Je croy que brief seray sanz doute mort.