Sechs Lieder in Schweizer Mundart , opus 5

Chumm zue mer i Schatte
Chumm zue mir is Gras,
I han i de Blueme
Scho Fläsche-n und Glas.
Es ruschet ir Linde,
Es ruschet am Rain,
Und Buechfinke singe
Wie Glogge so rein.
Chum blib e chli bimer
Und sitz e chli ab,
Zum Sitze ghörts trinke,
Zum Meitli der Chnab.
Chumm gimmer dis Händli
Und trink us mim Glas,
Chumm zue mer i Schatte,
Chumm zue mer is Gras.

Es goht mer ruch bi frömde Lüte,
Und ihre Sinn ist hert we Stei,
Und jetz, wo d' Obeglogge lüte  -- 
Jetz gäll, arms Härz, jetz wämmer hei? 

Jetz brönnt's erst Liecht deheim im Dörfli
Und's Müeterlei sitzt ganz alei
Und dänkt a me, wenn d' Bärge dunkle  -- 
Jetz chumm, liebs Härz, jetz gömmer hei!

Der Sigrist ist e räße Ma,
Es ist e ruchi Sach,
Er hüetet wärli Tag und Nacht
Sis Meili wen e Drach.

I warte, bis er d'Glogge zieht,
Denn bin I flingg zer Hand,
Denn chönne mer gschwind z'säme stoh
Und schätzle mit enand.

Ir Höchi schället's Glingglanggling
Und cheßlet über's Land,
Und unde simmer au nid still
Und schätzle mit enand.

E Rägeboge glänzt, 
Wo bis uf d'Ärde goht  --  
Dem wird e Wunsch erfüllt, 
Wo gschwind der Schueh abzieht 
Und drüber schlot. 

E Rägeboge chunt  --  
Mer sind no Büebli gsi  --  
Und stoht im Fäld we Für: 
Mis Gspönsli wirft fi Schueh 
Gschwind drüber i. 

E Rägeboge schwint, 
Und i stoh trurig do; 
I bi halt barfueß gsi 
Und ohni Glück  --  es goht 
Mer hüt no noh. 

Übers Johr wenns Fäld wieder Blume treit,
Bi-n-i wit und furt i der Ewigkeit.
Gang nid uf mis Grab, gang nid zue mim Stei,
Mach dir's Härz nid schwer: Glaub mer, i bi hei!

Möcht immer ledig blibe,
Möcht immer ledig si!
Dir chönnet lang so tribe: 
"O Chind, ergibt di drei!" 

Möcht immer ledig blibe,
Möcht immer ledig si,
Und nähm' i doch no eine,
So müeßt's e Schwizer si!