Don Chisciotte della Mancia

De cavaliere arrante  
ne truove ogne tantillo,
ch'anno co li contante
nnemmico lo vorzillo,
e po co la sciù scigna
veneno a taffia'.
Ma si le lasse niente:
'mbrogliate 'nfra la ggente,
lo cavaliere sbigna:
madamma se l'affuffa,
e co na bella truffa
te lasseno a canta'.

Tu lo focile 'mpietto  
mme jette ticche ticche:
l'esca a lo ffuoco azzicche,
pe farela appiccia'.
E mò che bbide nn'aria
sagli' l'allummenaria,
stuta, mme staje a ddi'?
Ah 'mpiso 'mpiso, 'mpiso,
tu mme vuò fa mori'.
Nè... Nè... m'avite 'ntiso?
Zì... Zì... Se pò sperà?
Schiavo de Varvaria,
vide, che percopia
canaglia, mme faje fa'.

Na femmena, che ha rente  
no tomo pe mmarito,
se spassa allegramente
le feste a commannà.
E si pe caso
chillo
jesse pe se sceta',
vasta no miezo squaso
pe connola a nennillo,
ca torna a ronfonia'.
Ma no marito gammaro
vo isso connolia'.