Quattro Canti su antichi testi napoletani

Auciello che ne viene da Caserta,
dimme, nennillo mio si è biv'o muorto.
L'aggiu lassato malatiell' a lietto,
steva piglianno medicin' a morte,
'na mana ce teneva li cunfiette,
'a 'n'ata ce teneva l'acqua forte.
Corre la mamma cu' li bbracci' aperte,
povero figlio mio p'amore è muorto!

Arbero piccerillo, te chiantaie,
i' t'aracquaie cu' li miei surore. 
Vennu lu vientu e te tuculaie. 
La meglia cimma me cagnaie culure,
la fronna ch'era verde ce seccaie,
la dorge fgrutto me cagnaie sapore:
Viene, morte, arremmeria a chisti guai,
mo' che nennillo mio ha cagnat'ammore!

La tortora ch'à perza la cumpagna
tutti li juorne sta malancunosa.
Trova nu pantaniello e se ci abbagna.
Vi', cumme se la veva 'ntruvulosa.
Po' se ne va a nu pizzo de montagna,
e là se chiagne li malanne suoie.

Ci aggiu tutta 'sta notte cammenato, Nenna;
semp' a lu scuro ce so' ghiuto, Nenna.
Mo' che rent' a 'sti pporte so' arrivato
pare che 'mparaviso so' trasuto.
Rapitele 'sti pporte ch' ite 'n chiuse,
facit' ascì l'addore de 'sti rrose!
Sento 'na voce da rint' a lu suonno:
vattenne, ninnu mio, ca t'accumpagno.