Ô ma belle maistresse ! à tous les moins prenez
De moy vostre servant ce Rossignol en cage,
Il est mon prissonnier, et je vis en servage
Sous vous, qui sans mercy en prison me tenez :

Allez donc, Rossignol, en sa chambre, et sonnez
Mon dueil à son oreille avec vostre ramage,
Et s'il vous est possible, émouvez son courage
A me faire mercy puis vous en revenez :

Non non, ne venez point, que feriez vous chez moy ?
Sans aucun reconfort, vous languiriez d'esmoy,
Un prisonnier ne peut un autre secourir.

Je n'ay pas Rossignol sur vostre bien envie,
Seulement je me hay et me plains de ma vie
Qui languit en prison et si n'y peut mourir.