My daddie is a cankered carle, 
He'll nae twine wi' his gear;
My minny she's a scolding wife, 
Hauds a' the house asteer:
But let them say, or let them do, 
Its a' ane to me,
For he's low down, he's in the broom, 
That's waiting on me.

My aunty Kate sits at her wheel, 
And sair she lightlies me,
But weel ken I its a' envy, 
For ne'er a jo has she:
But let them say, or let them do, 
Its a' ane to me,
For he's low down, he's in the broom, 
That's waiting on me.

My cousin Kate was sair beguiled 
Wi' Johnny i' the glen, 
And ay sinsyne she cries, beware 
Of false deluding men:
But let them say, or let them do, 
Its a' ane to me,
For he's low down, he's in the broom, 
That's waiting on me.

Glee'd Sandy he came west ae night, 
And spier'd when I saw Pate,
And ay sinsyne the neighbours round, 
They jeer me ear and late: 
But let them say, or let them do,
Its a' ane to me,
For he's low down, he's in the broom, 
That's waiting on me.