Je suis Amour, le grand maistre des Dieux,
Je suis celuy qui fait mourir les cieux,
Je suis celuy qui gouverne le monde,
Qui le premier hors de la masse éclos,
Donnay lumiere et fendis le Chaos,
Dont fut basty ceste machine ronde.

Rien ne sçauroit à mon arc resister,
Rien ne pourroit mes fléches éviter,
Et enfant nud je fai toujours la guerre :
Tout m'obeit, les oiseaux émaillés,
Et de la mer les poissons écaillés,
Et les mortels qui habitent la terre.

La paix, la treve, et la guerre me plait,
Du sang humain mon appetit se pait,
Et volontiers je m'abreuve de larmes :
Les plus hautains sont pris à mon lien,
Le corselet au soldat ne sert rien
Et le harnois ne deffend les gendarmes.

Je tourne, change, et renverse et deffaitz
Ce que je veux, et puis je le refaitz,
Et de mon feu toute ame est échauffée,
Je suis de tout le seigneur et le roy,
Rois et seigneurs vont captifs apres moy,
Et de leurs cœurs je bastis mon trophée.

De Jupiter j'ay le sçeptre dompté,
Jusqu'aux enfers j'ai Pluton surmonté,
Et de Neptun' j'ai blessé la poictrine,
De rien ne sert aux ondes la froideur
Que les Tritons ne sentent mon ardeur,
Et que mon feu n'embrase la marine.

 ... 

L'homme est de plomb, de rocher, et de bois
Qui n'a senti les traits de mon carquois,
Seul je le fais, et courtois et adextre :
Les cœurs sans moi languissent refroidis,
Je les rends chautz, animés et hardis,
Et bref je suis de toute chose maistre.

Qui ne me voit au monde ne voit rien,
Je suis du monde, et le mal et le bien,
Je suis le doux et l'amer tout ensemble :
Je n'ay patron ny exemple que moy,
Je suis mon tout, ma puissance, et ma loy,
Et seulement à moi seul je ressemble.

Juno la grande, aussi Venus me suit,
Et la guerriere en pompe me conduit,
Je suis aveugle, et si j'ai bon veüe,
Je suis enfant, et si suis des plus vieux,
Foible et puissant, superbe et gracieux,
Et sans viser je frappe à l'imporveüe.

 ...