Ayant pour vostre amour mille fois soupiré
Sans que vostre rigueur en peust estre amolie,
J’invoquay tant la mort qu’un aspre maladie
S’offrit à mon secours comme avoy desiré :

J’avoy desja le teint pale et défiguré,
J’avois perdu l’esprit la parolle et l’ouye,
Et m’estimois heureux par la fin de ma vie
Voir finir la rigueur d’un mal demesuré.

Mais vous, qui m’estes plus que la mort inhumaine,
Ne permistes allors qu’avec si peu de peine
Je fusse chastié de ma temerité. 
Las souffrez que je meure ! encor que mon offense
D’entreprendre d’aimer une divinité
Merite beaucoup plus que la mort de souffrance.