Deus est ensi conme li pellicanz
Qui fet son nif el plus haut arbre sus,
Et li mauvès oisiaus, qui vient de jus,
Ses oisellons ocit : tant est puanz;
Li peres vient destroiz et angoisseus,
Du bec s’ocit, de son sanc dolereus
Vivre refet tantost ses oisellons.
Deus fist autel, quant fu sa passions:
De son douz sanc racheta ses enfanz
Du Deable, qui trop estoit poissanz.

Li guerredons en est mauvès et lenz,
Que bien ne droit ne pitié n’a mès nus,
Ainz est orguels et baraz au desus,
Felonie, traïsons et bobanz.
Mult par est or nostre estaz perilleus;
Et se ne fust li essamples de ceus
Qui tant aiment et noises et tençons
– Ce est des clers qui ont lessié sarmons
Por guerroier et pour tuër les genz–
Jamès en Dieu ne fust nus hons creanz.

Nostre chiés fet touz noz menbres doloir,
Por c’est bien droiz qu’a Dieu nos en plaingnons;
Et granz corpes ra mult seur les barons,
Qui il poise quant aucuns veut valoir;
Et entre gent en font mult a blasmer
Qui tant sevent et mentir et guiler;
Le mal en font deseur aus revenir;
Et qui mal qiert, maus ne li doit faillir.
Qui petit mal porchace a son pouoir,
Li granz ne doit en son cuer remanoir.

Bien devrions en l’estoire vooir
La bataille qui fu des deus dragons,
Si com l’en trueve el livre des Bretons,
Dont il couvint les chastiaus jus cheoir:
C’est cist siecles, qui il couvient verser,
Se Deus ne fet la bataille finer.
Le sens Mellin en couvint fors issir
Por deviner qu’estoit a avenir.
Mès Antecriz vient, ce poëz savoir,
As maçues qu’Anemis fet mouvoir.

Savez qui sont li vil oisel punais
Qui tüent Dieu et ses enfançonèz?
Li papelart, dont li nons n’est pas nèz.
Cil sont bien ort et puant et mauvès ;
Il ocïent toute la simple gent
Par leur faus moz, qui sont li Dieu enfant.
Papelart font le siecle chanceler;
Par saint Pere, mal les fet encontrer:
Il ont tolu joie et solaz et pès.
Cil porteront en Enfer le grant fès.

Or nos dont Deus lui servir et amer
Et la Dame, qu’on n’i doit oblïer,
Et nos vueille garder a touz jorz mès
Des maus oisiaus, qui ont venin es bès!