Egidius, waer bestu bleven? 
Mi lanct na di, gheselle myn;
Du coors die doot, du liets mi tleven. 
Dat was gheselscap goet ende fyn,
Het sceen teen moeste ghestorven syn. 

Nu bestu in den troon verheven,
Claerre dan der zonnen scyn;
Alle vruecht es di ghegheven. 

Egidius, waer bestu bleven? 
Mi lanct na di, gheselle myn;
Du coors die doot, du liets mi tleven. 

Nu bidt vor mi, ic moet noch sneven,
Ende in de weerelt liden pyn;
Verware myn stede di beneven:
Ic moet noch zinghen een liedekyn;
Nochtan moet emmer ghestorven syn. 

Egidius, waer bestu bleven? 
Mi lanct na di, gheselle myn;
Du coors die doot, du liets mi tleven.