Dame, mon cuer emportez,
 Dont tant sui desconfortez
 Que vraiment
 Durer ne puis nullement,
 Se ne l'amez
 Et se vous ne le gardés
 Songneusement.

 Car il s'est si ligement
 Et si amoureusement
 A vous donnés
 Qu'à vostre honneur seulement
 Est tout son entendement;
 Bien le savés.
 Dont se vous ne le volés,
 Dame, et vous le deboutés,
 Legierement
 Porrés savoir, se je ment
 Qu'ocis m'arés,
 Se vous ne me secourés
 Procheinnement.
 Dame, mon cuer emportez.

 Je pleure moult tendrement
 Et soupir pardondement,
 Quant vous partés
 Et faire ne plus comment
 Vous die "à Dieu vous commant."
 Desesperez
 En sui et si forcenez,
 Quant si mal sui fortunez,
 Qu'à grief tourment
 M'ocira vo partement.
 Dire l'orrés,
 S'excusé ne m'en tenez
 Entierement.
 Dame, mon cuer emportez.

 Dame, vo viaire gent,
 Dous, amoureus et plaisant,
 Est figurez
 Et mon cuer si proprement
 Qu'adès le voy clerement;
 Et ne doubtés
 Que vrais seray et secrés,
 Puis qu'einsi mon cuer avez
 Parfaitement.
 Pour ce vous pri humblement,
 Ne m'oubliez,
 Qu'amée de moy serés
 Tres loyaument.
 Dame, mon cuer emportez,
 Dont tant sui desconfortez
 Que vraiment
 Durer ne puis nullement,
 Se ne l'amez
 Et se vous ne le gardés
 Songneusement.