De tout sui si confortée
 Que ja mais n'iert hostelée
 Tristesse n'esmay
 En mon cuer, ainçois aray
 Lie et jolie pensée,
 Tant com je vivray.

 Bien faire et avoir cuer gay,
 C'est tout; plus n'emporteray,
 Quant seray finée;
 Dont lie et loiaulz seray
 Et le contraire feray
 De ma destinée,
 Car lasse, desconfortée,
 Triste, dolente, esplourée
 Esté lonc temps ay.
 Mais je me conforteray
 Et celuy qui tant m'agrée
 Sur tous ameray.
 De tout sui si confortée
 Que ja mais n'iert hostelée
 Tristesse n'esmay
 En mon cuer, ainçois aray
 Lie et jolie pensée,
 Tant com je vivray.

 Si que gaye me tenray
 Ne ja ne le guerpiray
 Heure ne journée,
 Car en ceste pel morray,
 Fors tant que je maudiray
 Longue demourée;
 S'onneur et sa renommée,
 Qui "tout passe" est appellée,
 Toudis garderay,
 Et tant com durer porray
 Plus que creature née
 Li obeyray.
 De tout sui si confortée
 Que ja mais n'iert hostelée
 Tristesse n'esmay
 En mon cuer, ainçois aray
 Lie et jolie pensée,
 Tant com je vivray.

 Ainsi riens ne soufferay
 N'à chose ne penseray
 Qui me desagrée
 Et le temps oublieray,
 Tant que revenir verray
 D'estrange contrée
 Li qui trop plus m'a amée,
 Servi, gardée, honnourée
 Que nulz; bien le sçay.
 Pays et foy li porteray,
 Pour ce qu'à li sui donnée
 De fin cuer et vray.
 De tout sui si confortée
 Que ja mais n'iert hostelée
 Tristesse n'esmay
 En mon cuer, ainçois aray
 Lie et jolie pensée,
 Tant com je vivray.