Dame, vostre dous viaire
 Debonnaire
 Et vo sage meinteing coy
 Me font vo service faire,
 Sans meffaire,
 De fin cuer, en bonne foy.

 Dame, et bien faire le doy;
 Car anoy,
 Griété, doleur ne contraire
 Onques en vous servant n'oy,
 Eins congnoy
 Que riens ne m'i puet desplaire
 Et qu'adès miex me doit plaire,
 Sans retraire,
 De tant com plus m'i employ,
 Car tant estes debonnaire
 Qu'exemplaire
 De tous les biens en vous voy.
 Dame, vostre dous viaire.

 Quant je remir vostre arroy
 Sans desroy,
 Où raisons maint et repaire,
 Et vo regart sans effroy,
 Si m'esjoy
 Que tous li cuers m'en esclaire;
 Car il le scet si attraire
 Par son traire
 Qu'en vous maint; et je l'ottroy.
 Si ne vueilliés pas deffaire
 Ceste paire,
 Dame; humblement vous en proy.
 Dame, vostre doous viaire.

 Car mis l'avés en tel ploy
 Qu'il en soy
 N'a riens n'ailleurs ne repaire
 Fors en vous, et sans anoy;
 N'il ottroy
 Ne quiert merci ne salaire
 Fors que l'amour qui le maire
 Vous appaire
 Et que tant sachiez de soy
 Qu'il ne saroit contrefaire
 Son affaire.
 C'est tout. Mon chant vous envoy.
 Dame, vostre dous viaire
 Debonnaire
 Et vo sage meinteing coy
 Me font vo service faire,
 Sans meffaire,
 De fin cuer, en bonne foy.