En mon cuer ha un descort
 Qui si fort le point et mort
 Que, sans mentir,
 S'Amours par son dous plaisir
 N'i met acort
 Avec ma dame, pour mort
 Me doy tenir.

 C'est de mon loyal Desir
 Qui me vuet faire jehir
 Le mal que port
 Et comment j'aim et desir
 Ma dame sans repentir
 Et sans confort.
 Mais Paour s'oppose fort
 Et dit que Desirs ha tort
 De ce querir,
 Qu'elle crient Refus oïr
 Qui pas ne dort
 Et Dangiers qui fait à mort
 L'amant venir.
 En mon cuer ha un descort
 Qui si fort le point et mort
 Que, sans mentir,
 S'Amours par son dous plaisir
 N'i met acort
 Avec ma dame, pour mort
 Me doy tenir.

 Si ne say que devenir,
 Quant de ma dame remir
 Le gentil port,
 Car Paour me fait fremir
 Et trambler et tressaillir
 Par son enort
 Et Desirs, sans nul deport,
 Fait mon cuer par son effort
 Taindre et palir;
 Biauté me vient assaillir,
 Douceur m'endort,
 Mais Amours me fait au fort
 Taire et souffrir.
 En mon cuer ha un descort
 Qui si fort le point et mort
 Que, sans mentir,
 S'Amours par son dous plaisir
 N'i met acort
 Avec ma dame, pour mort
 Me doy tenir.

 Las! einsi m'estuet languir,
 Pleindre, plourer et gemir
 En desconfort,
 Ne bien n'ay for souvenir,
 Dous penser et li servir.
 Là me confort,
 Là seulement me deport,
 Là sont geté tuit mi sort
 Et là me tir;
 Là vueil je vivre et morir
 Et là m'acort;
 Là seront tuit mi ressort
 Jusqu'au morir.
 En mon cuer ha un descort
 Qui si fort le point et mort
 Que, sans mentir,
 S'Amours par son dous plaisir
 N'i met acort
 Avec ma dame, pour mort
 Me doy tenir.