Gais et jolis, liés, chantans et joieus
 Sui, ce m'est vis, en gracieus retour,
 Pleins de desirs et en cuer familleus
 De reveoir ma dame de valour,
 Si qu'il n'est maulz, tristesse ne dolour
 Qui de mon cuer peüst joie mouvoir:
 Tout pour l'espoir que j'ay de li veoir.

 Car mes cuers est si forment convoiteus
 De remirer son tres plaisant atour,
 Son gentil corps, son dous vis gracieus,
 Son dous regart et sa fresche coulour,
 Par qui je sui plains de loyal amour,
 Qu'ailleurs ne puis penser ne main ne soir:
 Tout pour l'espoir que j'ay de li veoir.

 Et puis que Diex m'a fait si eüreus
 Que je verrai la parfaite douçour
 De ma dame pour qui sui amoureus,
 Obeissans à li sans nul sejour,
 Je la doy bien honnourer sans folour,
 Quant riens ne puet mon cuer faire doloir:
 Tout pour l'espoir que j'ay de li veoir.