J'am miex languir en ma dure dolour
 Et puis morir, s'Amour le prent en gré,
 Qu'avoir mercy, se ce n'est à l'onnour
 De vous, dame, que j'aim sans fausseté;
 N'oncques en moy n'ot autre volenté
 Ne ja n'avra, pour peinne que j'endure,
 Et me fussiés ce mille fois plus dure.

 Comment que j'aie en tristece et en plour
 Langui lonc temps par vostre cruauté
 Et que plus loing soie de jour en jour
 De la merci que j'ay tant desiré,
 Mais ne lairay pour ce qu'en loyauté
 Ne vous aimme seur toute creature,
 Et me fussiés ce mille fois plus dure.

 Pour ce vous pri, dame, qui este flour
 De tous les biens et de toute biauté
 Et qui avés en grace et en valour
 Et en plaisant maintieng tout sormonté,
 Que vous daingniés avoir de moy pité,
 Que ja vers vous ne penseray laidure,
 Et me fussiés ce mille fois plus dure.