Liement me deport
Par samblant, mais je port,
Sans joie et sans deport,
Une si grief pointure
Que je sui au droit port
De mort, sans nul deport
Se d’amours n’ay tel port
Qui me pregne en sa cure.

Car quant de vo figure
La douce pourtraiture
Dedens mon cuer recort,
Espris sui d'une arsure
Ardant, crueuse et sure,
[Pleinne de tout descort]1;
Car Desirs son effort
Fait de moy grever fort,
Mais j'ay cuer assez fort
Contre sa blesseüre.
Si ne me deconfort,
Car d'espoir me confort
Qui me donne confort
En vostre douceur pure.
  Liement me deport...

Si qu'einsi m'asseüre
Espoirs, qui en moy dure,
Vers Desir qui ha tort,
Quant sans nulle mesure
Quiert ma desconfiture,
Qu'à moy toudis s'amort,
N'en riens ne s'en remort.
Il ne tent qu'à ma mort,
Il me point, il me mort:
Trop me nuist sa morsure.
Il m'aroit tantost mort
Par son mervilleus sort,
Se n'estoit le ressort
D'esperence seüre.
  Liement me deport...

Mais pour peinne qu'endure,
Tant soit à porter dure,
N'orrez vilain rapport,
Que je pense laidure,
Barat ne mespresure
Vers vostre gentil port;
A Amours m'en raport.
Et en Pitez endort
Mon desir qui ne dort.
Joie ert pour moy meüre.
Dieu pri qu'il vous enort,
Si qu'en soiez d'acort,
Belle, qu'à vous m'acort
Seur toute creature.
  Liement me deport...