Malgré Fortune et son tour
 Mon amoureuse clamour
 Publieray
 Et par tout me pleinderay
 De fine Amour
 Qui sueffre en moy tel tristour
 Et tel esmay
 Que jamais joie n'aray,
 S'einsi demour.

 Car faire vueil sans demour
 De mon amoureus labour
 Un piteus lay
 Que je nomme et nommeray
 Le lay de plour;
 De mes larmes en destour
 L'arrouseray,
 N'autre confort ne querray
 De ma dolour.

 Car Fortune m'est anemie,
 Amours me het, Pitez m'oublie,
 Esperence s'est endormie
 Et ma dame ne me vuet mie,
 Quant nès dou quart
 De son resgart,
 Nompas de la centisme part,
 Ne vuet souffrir qu'enrichis soie.
 N'est biens qui soit de ma partie:
 Jois s'est de moy departie,
 Tristece me fait compaingnie,
 Doleur me gouverne et maistrie,
 Qui ne se part
 Ne main ne tart
 De mon cuer, eins le font et art
 Et puis en mes larmes le noie.

 Je croy que li ciels me guerrie
 Et que Fortune a grant envie
 De moy tollir honneur et vie
 Pour plaire à ma dame jolie;
 Mais se l'espart
 Seur moy s'espart
 De ses dous yex, je n'ay resgart
 De mort pour mal qu'Amours m'envoie;
 Et s'il li plaist que je devie
 De l'amoureuse maladie,
 Je ne puis, à meins que je die
 Qu'onques ne fu si dure amie
 Et que le dart
 Qui mon cuer art
 Vient de sa biauté, que Diex gart,
 Quant riens fors moy ne li anoie.

 C'est ce pour quoy je me dueil.
 Avec ce son riant oueil
 Et son gracieus accueil
 M'ont ad ce mis
 Que je sui ses vrais amis
 Et estre vueil;
 Mais la bele sans orgueil,
 Qui met en moy tout ce dueil,
 Ne vuet que passe le sueil
 De son pourpris
 Ne que voie son cler vis,
 Si com je sueil.

 C'est la cause de mon dueil
 Dont je pers tout mon escueil;
 C'est ce pour quoy mon vis mueil,
 Com vrais sougis
 Qui n'ai meffait ne mespris
 Contre son vueil;
 Et pour ce en l'amoureus brueil,
 Ce m'est vis, la verge cueil
 Pour moy batre et me despueil,
 Comme aprentis
 Qui n'a d'avoir joie apris
 Lettre ne fueil.

 Biau sire Diex! comment puet ce estre
 Que je sui si fort mis à mestre
 Que departir,
 Deguerpir
 Ne fuïr
 Ne puet mes cuers de son dous estre
 Eins est toudis dessous sa destre
 Pour li servir,
 Oubeir
 Et cherir?

 Herbe vert ou flour de genestre
 Me puet o les bues faire paistre,
 A son plaisir,
 Et morir,
 Sans mentir.
 Nulle si plaisant ne puet nestre;
 C'est uns drois paradis terrestre
 De li veïr
 Et oïr
 Et sentir.

 Comment est sa douceur pure
 Douce à tous et à moy sure
 Et ne cure
 De ma cure
 Ne de la mortel pointure
 Dont mes cuers est entechiés,
 Et seur toute creature
 L'aim d'amour ferme et seüre?
 Or figure
 Sa figure
 En mon cuer la pourtraiture
 De Mort. N'est ce grans meschiés?

 Quant tres humblement l'endure,
 Et si n'est chose si dure
 Com m'ardure
 Qui tant dure
 Que je vif contre nature,
 Si qu'Amours qui est mes chiés
 Fait envers moy mespresure,
 Qui quiert ma desconfiture
 N'à mesure
 Ne mesure
 Ma triste pensée obscure.
 Par ma foy, c'est grans pechiés.

 Pour ce vous pri,
 Plourez avec my,
 My loyal amy;
 Espandez vo plour seur mi
 Pour moy faire plus doloir,
 Et je vous di
 Que mi anemi
 Seront assevi,
 S'il voient partir par mi
 Mon dolent cuer sans espoir,

 Qui m'a guerpi
 Et mis en oubli
 Pour estre à cely
 Qui n'a que faire de li
 Et qui ne le vuet avoir.
 Si m'en defri,
 Qu'onques mais ne vi
 Maintieng si joli.
 Or m'a de s'amour bani
 Pour amer sans decevoir.

 Si ne sai que faire;
 Ne m'en puis retraire
 Et ne li puis plaire,
 Qu'Amours qui me maire
 Me fait plus contraire
 Qu'Alixandres ne fist Daire;
 Et si ne m'os traire
 Vers son dous viaire
 Pour mes maus retraire,
 Car miex me vaut taire
 Qu'à li plus desplaire,
 Qui me puet faire et deffaire.

 Et la debonnaire
 Qui est de bonne aire,
 Blanche, blonde et vaire,
 D'onneur exemplaire,
 Le tres dous repaire
 Me vée où elle repaire.
 Si n'en puis attraire
 Amoureus salaire
 Pour crier ne braire;
 Demourer au Quaire
 Et vestir la haire
 Vaudroit miex qu'estre en tel haire.

 Si que pleindre
 Ne compleindre
 Ne me vueil plus, eins vueil feindre
 Que me dolereus complaint
 Soient meindre,
 Puis qu'ateindre
 Ne puis à riens qui esteindre
 Puist m'ardeur, ne qu'elle m'aint.

 Et se teindre
 Et desteindre
 Me fait, pour amer et creindre,
 Souvent et de divers taint,
 D'espoir greindre
 Me doy ceindre,
 Puis qu'elle scet que sans feindre
 Mes cuers tous en li remaint.

 Fi de desconfort
 Et fi d'omme fort
 Qui ne prent au fort
 Vigueur et confort.
 Li cisnes contre sa mort
 Se reconforte en chantant.
 Pour ce me confort,
 Et si me deport
 Es maus que je port,
 Ne mauvais rapport
 Ja de moy ne de mon port
 N'orra celle que j'aim tant,

 Se ce n'est à tort;
 Qu'ennemis ne dort
 Et maint cuer entort
 Prennent grant deport
 En mesdire et grever fort
 Maint tres fin loial amant
 Et font leur effort
 Par mauvais enort
 De mettre descort
 Entre bon acort.
 Or me gart Diex de leur sort
 Faus, mauvais et decevant.

 Et pour ce amoureusement
 Endurer
 Les maus d'amer
 Vueil sans desroy;
 Et, certes, faire le doy
 Tres humblement,
 Qu'autrement
 Pas longuement
 Ne puis durer;
 Car qui vuet honneur garder
 Et bonne foy
 Son anoy
 Sueffre en recoy,
 Celeement;

 Nompas si ouvertement
 Souspirer
 Et dementer
 Sans nul arroy.
 Je parole contre moy,
 Car vraiement,
 Le tourment,
 Que j'ay, souvent,
 Par desirer,
 Me fait tellement parler;
 Vesci pour quoy
 Onques n'oy
 Mercy n'ottroy
 N'aligement.

 Or vueil aler à confesse
 De ma fole hardi hardiesse,
 Repenteus et pleins d'umblesse,
 A Venus qui est deesse
 Et souvereinne maistresse
 D'amours et de tous ses fais,
 Qui moy de blamer ne cesse
 Dou pechié de la rudesse
 Que j'ay fait par ma simplesse
 Contre Amours; si m'en confresse,
 Et Vesta dira la messe
 En pardon de mes meffais,

 Qui des nimphes est prestesse.
 Si pri Venus qu'elle adresse
 Mon cuer, s'il n'est en l'adresse
 D'amours, et que ma tristesse
 Mue en joie et en leesse,
 Et par ce sera refais;
 Et qu'elle face largesse
 Des biens d'amours sans promesse,
 Par franchise et par noblesse,
 Pour garir ce qui me blesse
 Et qui me tient en destresse:
 Autrement je sui deffais.

 Or en face son millour,
 Car, sans penser deshonnour,
 La serviray
 Et le gracieus corps gay
 Qu'aim et aour
 De cuer, de corps, de vigour,
 Tant com vivray;
 Ne mon cuer n'en partiray
 De son sejour.

 Et se doucement savour
 Des biens d'amours la savour,
 Garis seray,
 Si qu'en chantant loeray
 La grant douçour
 De ma dame et son honnour,
 Exausseray,
 N'autre ja mais n'ameray,
 Heure ne jour.