Phyton, le mervilleus serpent
 Que Phebus de sa flesche occit.
 Avoit la longueur d'un erpent,
 Si com Ovides le descrit.
 Mais onques homs serpent ne vit
 Si fel, si crueus ne fier
 Com le serpent qui m'escondit,
 Quant à ma dame merci quier.

 Il ha sept chiés, et vraiement,
 Chascuns à son tour contredit
 La grace, où mon vray desir tent,
 Dont mes cuers an doleur languit:
 Ce sont Refus, Desdaing, Despit,
 Honte, Paour, Durte, Dangier,
 Qui me blessent en l'esperit,
 Quant à ma dame merci quier.

 Si ne puis durer longuement,
 Car ma dame tres douce rit
 Et prent deduit en mon tourment
 Et ès meschiés, où mes cuers vit.
 Ce me destruit, ce me murdrit,
 Ce me fait plaindre et larmoier,
 Ce me partue et desconfit,
 Quant à ma dame merci quier.