Dame, ne regardez pas
 A vostre valour
 Ne à moy, se je sui bas,
 Mais loial Amour
 Resgardez, qui par douçour
 M'adonne d'un amoureus dart,
 Par vostre dous plaisant regart.

 Dame, faite à droit compas,
 Je n'aim ne aour
 Fors vous car tuit mi solas,
 Mi ris et me plour,
 Mi bien, mi mal, mi vigour,
 Tout ce me vient, se Diex me gart,
 Par vostre dous plaisant regart.

 Dont je sui si en vos las
 Qu'adès par savour
 Humblement sans estre las
 Recoy ma dolour.
 Las! et vos cuers n'a tenrour
 De l'ardure qui le mien art
 Par vostre dous plaisant regart.