Se d'amer me repentoie
 Ne feingnoie,
 Trop seroie contre mi;
 Car tout mon temps perderoie,
 Que n'aroie
 Ja mais bon jour ne demi.

 Si vueil amer mon amy
 Loiaument, où que je soie,
 Et avoir le cuer joli,
 Gay, chantant et plein de joie;
 Ne pour chose que je voie
 Ne que je oie
 Ne le quier mettre en oubli,
 Car, s'autrement le faisoie,
 Mort l'aroie,
 Sans cop ferir, et trahi.
 Se d'amer me repentoie.

 Il m'a longuement servi
 Si bien que miex ne vorroie,
 N'onques en li riens ne vi
 De quoy reprendre le doie.
 M'onneur vuet plus que la soie.
 Qu'en diroie?
 Secrés et loiaus est, si
 Que, se souhaidier voloie,
 Je faurroie
 A souhaidier miex qu'en li.
 Se d'amer me repentoie.

 Chascuns dit que c'est celi
 Qui miex tient la droite voie
 Pour avoir des biens le tri
 Que Nature as siens ottroie.
 Pour quoy dont ne l'ameroie?
 Trop aroie
 Le cuer divers et failli,
 S'il m'aimme et je ne l'amoie,
 Et creoie,
 Quant il l'a bien desservi.
 Se d'amer me repentoie
 Ne feingnoie,
 Trop seroie contre mi;
 Car tout mon temps perderoie,
 Que n'aroie
 Ja mais bon jour ne demi.