Ce ris plus doux que l'oeuvre d'une abeille,
Ces dents, ainçois deux rempars argentez,
Ces diamans à double ranc plantez
Dans le coral de sa bouche vermeille :
 
Ce doux parler qui les ames resveille,
Ce chant qui tient mes soucis enchantez,
Et ces deux cieulx sur deux astres antez,
De ma Deesse annoncent la merveille.
 
Du beau jardin de son jeune printemps,
Naist un parfum, qui le ciel en tous temps
Embasmeroit de ses doulces aleines.
 
Et de là sort le charme d'une voix,
Qui touts ravis fait sauteler les bois,
Planer les montz, et montaigner les plaines.